Baarlamanka Soomaliya oo u yeeray qaar ka mid ah
Wasiirada Xukuumadda Nuur Cadde.
Beydhabo 08
/May/2008
Waagacusub.com
Afhayeenka Baarlamaanka KMG
Soomaaliya Sheekh Aadan Madoobe ayaa qoraal uu u gudbay
xukuumadda Ra’isal wasaare Nuur Cadde waxa uu kaga
dalbaday in ay Baarlamaanka hor yimaadaan wasiirada
Wasaaradaha Gaashaandhiga iyo Arrimaha Gudaha iyo Amniga
ee dowladda KMG Soomaaliya.
Sheekh Aadan Madoobe waxa uu sheegay in wasiirada
Wasaaradahaas laga doonayo in wax laga weydiiyo xaaladaha
dalka ka jira, gaar ahaan kuwa quseeya wasaaradahooda,
iyadoo xilligani qas weyni uu ka jiro arrimaha amniga
dalka Soomaaliya.
Baarlamaanka Soomaliya oo muddooyinkan dambe dardargeliyey
howlaha la xisaabtanka xukuumadda Ra’isal wasaare Nuur
Cadde ayaa dhawaan waxay su'aalo weydiiyeen Ra’isal
wasaaraha iyadoo waxyaabihii ugu muhiimsanaa ee ay
weydiiyeena ay ka mid ahaayeen waxyaabihii u qabsoomay
muddadii ay jirtay xukuumaddiisa, qarashka soo gala iyo
gobollada gacanta dowladda ka sii baxaya.
Wasaaradaha Gaashaandhiga oo ku shaqo leh arrimaha
ciidamada iyo wasaaradda Amniga oo arrimahba ammaanka
dalka Soomaaliya ku lug leh ayaa la filayaa in wax laga
weydiiyo xaaladaha amaanka ee gobolada dalka iyo inta
ciidan ee u diiwaan gashan wasaaradda Gaashaandhiga iyo
waxqabadkiisa, iyadoo ay baddatay cabashada ka imaanaysa
dadweynaha eek u wajahan ciidamada iyo waxtar la’aanta
ciidamada dowladda Soomaaliya oo sii siyaadeysa.
Wasiirka arrimaha gudaha iyo amniga oo horey Baarlamaanku
uu ugu yeeray si su’aallo looga weydiiyo ayaa ka dib
dhacay xilligii loo yeeray oo ahayd dorraad haatanna lama
oga waqtiga labadaasi wasiir ee Baarlamaanku u yeeray ay
hor tegayaan Golaha Baarlamaanka hortiisa.
Halkaan ka dhageyso Warbixinta Weriye Xasan Cadde
