"Ganacsatadu iyagaa lacagaha soo daabacday xaqna ma
ahan in ay hadda yiraadaan ma rabno, waayo iyagaa horey
u soo daabacay" "Madaxweyne C/llaahi Yuusuf" .
Landon 08
/May/2008
Waagacusub.com
Madaxweynaha dowladda KMG
Soomaaliya C/llaahi Yuusuf Axmed ayaa wareysi uu siiyey
idaacadda VOA-da laanteeda afka Soomaaliga ku sheegay in
aysan suurtagal aheyn in la diido lacagta duuga iyo kuwa
jeexan ee Kunka Shillin ee ka shaqeysa dalka Soomaaliya.
Madaxweyne Yuusuf waxa uu sheegay in muddadii dalku
fowdada uu ku jiray lacago badan oo faalso ah la soo
daabacday, suuqyadana la soo geliyey, sidaa awgeed aysan
suurtagal aheyn in lacagahaasi hadda la diido.
"Ganacsatadu iyagaa lacagaha soo daabacday xaqna ma ahan
in ay hadda yiraadaan ma rabno, waayo iyagaa horey u soo
daabacay" ayuu yiri mnadaxweynaha oo tibaaxay in
dowladdiisu ku talo jirto in ay soo sameyso lacag tayo leh
oo qiimaheeda iyo tayadeeda leh.
Waxa uu madaxweynuhu eedeeyey dad uusan magacaabin oo uu
sheegay in ay arrinta diidmada lacagta si kale u
maroojinayaan, isla markaasna u siyaasadeynayaan.
Dhinaca kale Madaxweyne Yuusuf waxa uu ka hadlay weerarkii
Mareykanku ku qaaday magaalada Dhuusa-mareeb ee xarunta
Gobolka Galgaduud halkaas oo duqeyntii Mareykanku ka
geystay ay ku dileen xubno sar sare oo ka tirsan
dhaqdhaqaaqa Al-shabaab ee dagaalka kala soo horjeeda
ciidamada dowladda Soomaaliya iyo kuwa Itoobiya ee
caawinaya, wuxuuna sheegay madaxweynuhu in weerarkaasi
sida uu yiri ay dani u jirto caalamka iyo Soomaaliya
intuba.
Halkaan ka dhageyso Warbixinta Weriye Xasan Cadde
