Weriyeyaashan oo
ay Hay'adda CARE International & USAID, kuwaas oo
waxbarasho saddex bilood ah ugu dirtay dalka Kenya oo
Arbacadii toddobaadkii hore dalka ku soo laabtay, waxa
muddadii ay dalkaas ku maqnaayeen soo barteen duruuf la
xidhiidha xirfadooda shaqo, iyaga oo aqoon iyo
waayo-aragnimo shaqo ka soo kasbaday kooraska waxbarasho
ee ay ka caawisay Hay'dda CARE, waxaanna aqoonta ay soo
barteen u dheerayd iyaga oo xarumaha warbaahineed ee ka
jira magaalada Nairobi ku soo qaatay tababaro, si ay
habka iyo nidaamka ay saxaafadda Kenya u shaqayso u soo
bartaan.
Khadar Maxamed Cakule oo ka mid ahaa
suxufiyiintii tababarka soo dhameystey ayaa ku
dheeraadey sida ay dhalinyaradaa suxufiyiinta ah ee
matalayey Somaliland u ahaayeen qaar si fiican u gutey
xilkoodii waxbarasho iyo waliba daacadnimadii,
isxilqaankii, firfircoonaantii iyo dadaalkii ay
muujiyeen mid ku reebay xusuus gaar ah macalimiintii iyo
maamulkii machadkii ay waxbarashada u joogeen, waxa kale
oo uu sheegey in halkaa waxbarashada kula qaateen afar
iyo toban suxufi oo kale oo ka kala socdey gobaladda
Puntland iyo koonfurta Soomaaliya balse ay kooxdani ka
socatey Somalialand ay ahaayeen kuwii ugu cadcadaa mar
walba haddii ay noqoto dhinaca ka qeybqaadashada shaqada
iyo aqoon kororsiga intaba.
Fahma Yusuf Ciise oo iyana ka mid
aheyd lixdaasi suxufi ayaa is barbardhigtey ka sokow
saxaafadda sida ay u kala duwan yihiin dhaqan ahaan iyo
nolol ahaanba bulshada Somaliland iyo bulshada Kenya.
Waxay tilmaantey sida bulshada Kenya ay u
qiimeeeyan waxbarasha iyo sida ay uga go'an tahey inay
dalkooda horumar gaarsiiyan, waxa ay barbardhigtey hanka
iyo heerka bulshada Somaliland ay waxbarashada ka taagan
yihiin. Waxaaney ku dardaartay bulshada Somaliland inay
u guntadaan kor u qaadista waxbarashada oo ah ta qudha
ee horumar lagu gaadhi karo laguna heli karo kala
dambeyn, amni iyo ismaqal.
Xafladda loo sameeyey suxufiyiintaas
oo ahayd mid si heer sare ah loo soo agaasimay, waxa
halkaa ka hadlay Mr. Xasan Jaamac oo ka tirsan Hay'adda
CARE/USAID ee kooraskan waxbarasho ugu deeqay
suxufiyiinta, waxaannu xusay sida ay hay'adiisa uga
go'an tahay wax la qabashada warbaahinta reer
Somaliland, isaga oo sheegay in kooraskan waxbarasho
noqon doonin kii ugu dambeeyey ee ay u qabtaan
saxaafadda.
Tifaftiraha guud ee Wargeyska madaxa
banan ee geeska Afrika, Maxamed Xuseen Jamac (Rambo) oo
isna ka Hadley xafladdaa ayaa sheegey inay wargeys ahaan
soo dhaweynayaan suxufiyiintan waxbarashada soo
dhameystey kana rajeynayaan iney wax cusub ku soo
kordhin doonaan warbaahinta dalka.
Sida oo kale waxaa halkaasi hadalo ka
soo jeediyey Agaasimaha Idaacada Radio Hargeisa, waxaanu
ku nuuxnuuxsadey in ay tahey markii ugu horeysay ee
suxufiyiin Somaliland ka socdaa ay waxbarasho u tagaan
dalka dibadiisa mudo intaa le'eg na ay aqoon kororsi
soo qaataan. Waxa kale oo uu sheegeey inuu ku faraxsan
yahay in suxufiyiintani mudadii ay halkaa joogeen la soo
shaqeeyeen hay'adihii warbaahineed ee dalkaasi Kenya oo
ay soo arkeen deegaan ka duwan deegaankii ay ka
shaqeynayeen.
Guddoomiyaha ururka suxufiyiinta
Somaliland ee SOLJA Mustafe Cabdi Ciise (Shiine) oo isna
halkaa ka hadlay ayaa xusay baahida ay suxufiyiinta reer
Somaliland u qabaan aqoon ku filan oo ay helaan,
waxaannu sheegay in Hay'adda CARE ay tahay ta qudha ee
inta badan gacanta ka gaysatay tababarrada suxufiyiinta,
waxaannu ka codsaday hay'adda in ay sii laban-laabto
gacanta ay warbaahinta Somaliland siiso, isaga oo u soo
jeediyey suxufiyiinta koraska waxbarasho ka soo qaatay
Kenya inay aqoontii ay soo barteen uga faa'iideeyaan
bulshadooda.
Weriyeyaasha xafladda loo sameeyey ee
ka soo laabtay Kenya-na waxa kala ahaayeen:
1. Fahma Yuusuf
Ciise WIJA & Jamhuuriya.
2. Khadar
Maxamed Cakuule HCTV
3. Barkhad
Maxamuud Kariye Ogaal
4. Mubaarig
Cabdi Yuusuf Radio Hargeysa
5. Nimco Axmed
Cali Geeska Afrika
6. Sadiiq
Maxamed Burmad Radio Hargeysa.
Shiine Cilmi
Kaahin
SDWO News Desk – Hargeisa
